Bondia wa Uingereza katika uzito wa light-heavyweight, Ben Whittaker, amenusurika mashambulizi makali ya dakika za mwisho kutoka kwa Conor Wallace na kushinda kwa pointi mjini Birmingham.
Whittaker, mwenye umri wa miaka 29, alitawala sehemu kubwa ya pambano hilo lililofanyika Utilita Arena, akitumia uwezo wake mkubwa wa kucheza kwa ustadi na mbinu zake za kumchanganya mpinzani.
Hata hivyo, Wallace kutoka Ireland Kaskazini alirejea kwa nguvu katika raundi za mwisho, akimtikisa Whittaker katika raundi ya 10 na kisha karibu kufanya mabadiliko makubwa katika raundi ya 12.
Whittaker alilazimika kutumia mbinu za kujilinda na kushikilia mpinzani hadi kengele ya mwisho ilipolia.
Majaji walimpa ushindi Whittaker kwa alama 117-111, 116-112 na 115-113, matokeo yaliyomfanya kuwa mpinzani wa lazima wa taji la dunia la IBF.
“Niliiona ikiwa rahisi sana na nikapunguza umakini kidogo. Alinipiga ngumi nzuri, lakini huo ndio mchezo wa ngumi,” Whittaker alisema baada ya pambano.
Aliongeza: “Ilipoanza kuwa rahisi sana nilikuwa nacheza sana na kufanya vituko visivyo vya lazima.”
Ushindi huo umeifanya rekodi ya Whittaker katika ndondi za kulipwa kufikia mapambano 13 aliyoshinda na sare moja, huku sasa akiwa kwenye nafasi ya kumkabili bingwa wa IBF, Dmitry Bivol.
Bivol pia anashikilia mikanda ya WBA ‘Super’ na WBO, na anatarajiwa kukabiliana na Callum Smith wa Liverpool mwezi Desemba.
Kwa upande wake, Wallace mwenye umri wa miaka 30 amepoteza pambano la pili pekee katika mapambano 19 ya kulipwa na tayari ametoa wito wa kufanyika kwa pambano la marudiano.
“Akihitaji kurudia pambano hili na kupata kipigo kingine, anaweza. Kama sivyo, tutaendelea,” Whittaker alisema.
Wallace Alikaribia Kumaliza Ndoto za Whittaker
Whittaker aliingia ulingoni kwa namna ya kuvutia, akisindikizwa na kundi la wapiga ala za muziki lililopiga wimbo wa WWE wa The Undertaker kabla ya kubadilisha na wimbo “Icon” wa Karen.
Licha ya kuwa anatokea West Bromwich iliyopo karibu na Birmingham, Whittaker alipokea mchanganyiko wa shangwe na kuzomewa kutoka kwa mashabiki takribani 5,000 waliohudhuria pambano hilo.
Pambano lilianza kuwa na msisimko mkubwa katika raundi ya tatu, wakati Whittaker alipomtingisha Wallace kwa ngumi iliyompiga upande wa paji la uso.
Wallace alianza kuonyesha dalili za kurejea katika raundi ya sita baada ya kumpiga Whittaker kwa ngumi nzito ya mkono wa kushoto.
Mambo yalikuwa hatarini zaidi katika raundi ya 10, ambapo Wallace alimpiga Whittaker kwa ngumi kali ya kushoto na kisha akampiga tena kwa nguvu, huku bondia huyo wa nyumbani akionekana kuwa katika matatizo makubwa.
Katika raundi ya mwisho, Wallace alishambulia kwa nguvu zote, huku Whittaker akionekana kuchoka na hata kuanguka mara tatu. Hata hivyo, waamuzi hawakuhesabu matukio hayo kama knockdown.
Hatimaye, Whittaker alifanikiwa kumaliza pambano na kupata ushindi, lakini Wallace aliweka wazi kuwa angeweza kubadili matokeo iwapo angepata muda zaidi.
“Ninaweza kujilaumu mwenyewe tu. Najisikia nina sapoti bora zaidi duniani. Usiku huu nilihisi kama ni pambano langu la nyumbani, ingawa lilikuwa Birmingham,” Whittaker alisema.
Promota Eddie Hearn amesema kuna uwezekano wa kufanyika pambano la marudiano, akieleza kuwa Whittaker tayari yupo kwenye nafasi ya kumkabili mshindi wa pambano kati ya Bivol na Smith, lakini huenda pambano hilo likafanyika hadi majira ya kiangazi mwakani.
Kwa sasa, Whittaker amepiga hatua kubwa kuelekea ndoto yake ya kutwaa ubingwa wa dunia, lakini pambano lake dhidi ya Wallace limeonyesha wazi kuwa safari hiyo haitakuwa rahisi.
