Love&Pain Sehemu Ya Kwanza (01)

Usiku mmoja, Mwanaume mmoja alikuwa akitoka Hospitalini,  alionekana kwenda hapo kwa ajili ya kumuona Mtu mmoja  aliyemfahamu sana tena alikuwa Mtu wa karibu sana kwake.  Mwanaume huyo alionekana kuwa mwenye mawazo fulani kichwani  pake, alikuwa amevalia koti la suti na jinzi chini akipigilia  raba kali yenye mg’ao. 

Ilitosha kujiridhisha kuwa Mwanaume huyo alikuwa na hela za  kutosha, tembea yake ilikuwa ya taratibu mno, ukimtazama  vizuri utagundua alikuwa na vita kichwani pake, alipofika  kwenye korido aligeuka na kutazama nyuma kisha alitaja jina  moja 

“Mandy!” Alilitaja jina hilo kisha alihema kiasi, kisha  aliendelea mbele kuuelekea mlango wa kutoka Hospitalini hapo.  Alikutana na nesi mmoja akiwa amebakisha hatua chache kutoka,  nesi huyo alimuita Mwanaume huyo jina lake 

“Desmond!!” Alipomuita ni kama alimzindua kutoka Mawazoni,  Mwanaume huyo aliyeitwa Desmond alijichekesha kidogo kabla ya  kusalimiana na nesi huyo 

“Aaah!! Lucia, Habari yako!” Alisalimia Desmond 

“Nzuri mbona una mawazo hivyo au kuna taarifa yoyote mbaya  kumuhusu Mandy?” Aliuliza nesi huyo aliyeonesha kumfahamu  Vizuri Desmond 

“Aaah! Hapana hali yake ipo vilevile, nimechoka tu na  majukumu ya hapa na pale” Alisema Desmond 

“Pamoja na yote Desmond, wewe ni Mwanaume mzuri sana, unajali  mno maana huishi kuja kumuona Mandy kwa kipindi chote ambacho  amekuwa hapa” Alisema Lucia 

“Ndiyo jukumu langu, nahitaji kwenda sasa” Alisema Desmond,  waliagana hapo kisha Desmond aliondoka zake huku Lucia  akimtazama Desmond kwa jicho la kuhitaji kumwambia kitu  lakini alishindwa.

Yalikuwa ni majira ya saa tano za Usiku, muda huo mvua  ilianza kuchapa kidogo na kumfanya Desmond akimbilie kwenye  gari yake, aliondoka Hospitalini hapo Usiku huo huku akiwa  kwenye gari alionekana kukumbuka jambo liliomuumiza, sauti ya  daktari ilijirudia kichwani pake 

“Mandy anaweza kupata ufahamu ndani ya siku chache zijazo,  hii ni habari njema Desmond” Alionekana kutofurahishwa na  taarifa ya Mgonjwa huyo kuwa sawa, alipiga usukani kwa hasira  kisha alielekea moja kwa moja kwenye jumba lake la kifahari  lililopo karibu na fukwe, ndipo alipokuwa akiishi. 

Alipoingia alitazama ukutani, aliiyona picha aliyopiga yeye  na huyo Mgonjwa aliyeitwa Mandy, mgonjwa huyo alikuwa wa  kike, picha hiyo ilieleza kuhusu Mandy na Desmond, Naam!  Walikuwa ni wana ndoa, Desmond aliitoa picha hiyo akaitupa  kutoka juu ya ghorofa hilo hadi chini 

“Mandy huwezi kuwa hai tena ni lazima nikumalize” Alisema  Desmond kwa hasira na hisia kali huku akionesha wazi kuwa  kulikuwa na jambo ambalo lilijificha kuhusu Yeye na mke wake  huyo aliyeitwa Mandy. 

Alikunywa pombe sana usiku huo huku simu yake ikiwa bize  kuita lakini hakuipokea kabisa, alikunywa na kulewa sana  akawa hajitambui, alilala hapo sebleni hadi asubuhi. 

********** 

Ilikuwa ni asubuhi ya siku iliyofuata, ndani ya ofisi moja  alikuwepo Mwanamke mzuri sana aliyeitwa Noela, Mwanamke huyu  alikuwa ni Mwanasheria. Alikuwa akifanya kazi yake hapo  ofisini huku akili yake ikionesha wazi kuwa haikuwa na  utulivu, mara zote alikuwa akijaribu kupiga simu bila  kupokelewa, baadaye alikuja jamaa mmoja aliyeitwa Zanda,  walikuwa ni marafiki waliokuwa wakifanya kazi ofisi moja ya  Wanasheria wa kujitegemea, mara moja Zanda aligundua Noela  hakuwa sawa aliketi akamuuliza 

“Vipi Noela una tatizo?” Alihoji Zanda huku akimtazama Usoni  Noela 

“Aaah! Nipo sawa Zanda usijali” Alijibu Noela 

“Noela nimefanya kazi na wewe kwa muda mrefu hivyo nakujuwa  vizuri sana, leo haupo sawa” Alisistiza Zanda, Noela  alimkubalia Zanda kuwa hayupo sawa ila ni mambo madogo tu  atayatatua.

Baada ya kupita muda kidogo Noela aliondoka ofisini akiaga  kuwa anajisikia vibaya. Zanda alimshangaa sana Noela,  alimkodolea macho akiwa anaondoka na gari yake kisha  alitikisa kichwa chake, Noela aliendelea kupiga simu bila  kupokea majibu yoyote yale hadi anafika nyumbani kwao,  alikuwa akiishi na Mama yake Mzazi ambaye alipendelea sana  kumuita Mlami 

Mama yake ( Mlami ) aligundua haraka kuwa Noela hayupo sawa  kifikra, alimuuliza akiwa amejilaza sofani 

“Kuna nini Noela huonekani kuwa sawa kabisa, unaonekana ni  mwenye mawazo mengi kichwani mwako” Alihoji Mama yake Noela  huku akimkata jicho la udadisi binti yake huyo wa pekee  ambaye alikuwa akimpenda sana baada ya Baba yake kufariki. 

“Ni Joshua Mama, tokea jana hapokei simu zangu. Sijui yuko  wapi” Alijibu Noela kama vile alikuwa amechokozwa na Mama  yake, alimpigia tena huyo Joshua 

“Ulijaribu kwenda kwake?” Aliuliza Mama yake, Noela  alimtazama Mama yake kwa jicho la kukata tamaa kisha  akatikisa kichwa ishara ya kuwa hakwenda nyumbani kwa Joshua  kisha alimwambia Mama yake 

“Msichana wake wa kazi anasema hakurudi tokea alipotoka jana  asubuhi” Alijibu Noela 

“Sasa atakuwa wapi na kwanini hapokei simu zako jamani”  Alisema Mama yake Noela 

“Mama tokea jana nimechanganikiwa kabisa, ngoja tu  nikapumzike maana nimeshindwa hata kufanya kazi leo kwasababu  yake” Alisema Noela 

“Haya sawa Mwanangu! Usijali sana huwenda yupo bize” Alisema  Mama yake Noela kisha Noela alionesha tabasamu feki akaelekea  chumbani kwake. 

Ndani ya jumba la kifahari la Desmond, alikuwa ndiyo anaamka  kutoka usingizini, alikuwa amelala palepale sebleni kutokana  na pombe kumzidia. Aliamka akiwa mchovu sana lakini alipoamka  tu alitaja jina la Mke wake Mandy kisha alitafuta simu yake  ambayo ilikuwa kando yake kisha akapiga Hospitalini kwa Nesi  Lucia 

“Vipi hali ya Mke wangu” Aliuliza Desmond huku akiwa na hofu  sana

“Mandy anaendelea na matibabu, bado hajapata ufahamu Desmond”  ilisikika sauti kutoka upande wa pili, ilikuwa ni sauti ya  Nesi huyo iliyotoka kwa kubembeleza sana 

“Asante! Kwa lolote unitaarifu mapema sana” Alisema Desmond  kisha alikata simu bila kusikiliza kingine kutoka kwa Lucia 

“Mandy kwanini hukufa? Kwanini upo hai? Kwa vyovyote vile  huwezi kutoboa siri nitakuuwa tu” Alisema Desmond kwa jazba  kisha alikagua vizuri simu yake, alikutana na simu nyingi  ambazo hazikujibiwa, moja ilikuwa ya Noela, alikutana na  meseji nyingi kisha alitabasamu tu. Akaelekea kuoga kisha  alitoka kwenye jumba hilo ambalo alikuwa akiishi hapo 

Safari ya Desmond ilikuwa ni kuelekea nyumbani kwa Noela,  kitendo cha Mama kusikia mlio wa gari kilimfanya achungulie,  alipoliona gari la Desmond haraka alikimbilia chumbani kwa  Noela akamwambia 

“Joshua amefika” Alisema Mama huyo, Noela hakuamini  alichokisikia naye alikimbilia nje, alimuona Desmond ambaye  yeye alikuwa akimfahamu kwa jina la Joshua. 

Alimkimbilia na kumkumbatia kwa furaha sana kisha chozi  lilimbubujika, alionesha ni wazi kuwa alikuwa akimpenda sana  Mwanaume huyo kisha alimuuliza 

“Joshua nimekutafuta sana ulikuwa wapi Mpenzi, nimeingiwa na  hofu mno” Desmond alicheka kidogo 

“Nimeamini kuwa unanipenda sana Noela, nilifanya kusudi ili  nipime upendo wako” Alisema Huyo aliyefahamika kwa jina la  Joshua lakini kule Hospitali alijulikana kama Desmond, hebu  tusonge na Uhondo wa Hadithi hii. 

Mama yake Noela alisimama akiwaangalia wapendanao hao, kisha  moyo wake ulikubali kuwa walikuwa wakipendana sana,  alitabasamu alafu akatangulia ndani huku Desmond ( Joshua )  na Noela wakifuatia. 

Walishinda hapo pamoja siku hiyo, walikula, walicheza pamoja  na kupeana mapenzi motomoto kisha baadaye waliondoka na  kuelekea kwenye nyumba ambayo Desmond alikuwa akiishi, hii  ilikuwa ni nyumba tofauti na ile aliyokuwa akiishi na Mke  wake. 

TURUDI MIAKA KADHAA ILIYOPITA

Ndani ya Kijiji kimoja, kulikuwa na familia moja iliyoishi  kwa shida sana. Familia hii ilikuwa ya Watu wawili tu, Baba  na Mwanaye. Walikuwa wameketi nje ya Banda lao, ukimya  ulikuwa umetawala sana hapo, Mtoto huyo mwenye miaka 11  alimuuliza Baba yake. 

“Baba tutaenda wapi?” Aliuliza akiwa anamtazama Bba yake  aliyekaa juu ya gogo la Mti 

“Unafikiria tutaenda wapi Desmond? Kifo cha Mama yako  kimeleta mkosi sana kwetu kila kitu kimeharibika” Alisema  Baba huyo, Mtoto huyo aliyeitwa Desmond ndiye huyu ambaye ni  Mume wa Mandy aliyeko Hospitalini, kumbe jina lake halisi ni  Desmond na siyo Joshua. 

“Usiseme hivyo Baba! Huwenda Mungu alipanga iwe hivi” Alisema  Mtoto Desmond 

“Alipanga tufukuzwe hapa Kijijini? Una mawazo ya kipumbavu  sana, huu ni mkosi aliouleta Mama yako!! Leo utakula Hizo  kauli zako” Alisema Baba yake huyo kisha aliondoka zake na  kumuacha Desmond akizidi kutafakari. Maisha yao yalikuwa Duni  sana, Desmond alidondosha chozi kisha alikimbilia kwenye  kaburi la Mama yake ambalo halikuwa mbali na banda lao,  alipiga magoti kisha alisema 

“Mama si hujakosea si ndiyo? Kwanini Baba anakuhukumu  hivi….Mama nauchukia umasikini, nakuahidi sitokufa  masikini” Alisema Desmond kisha aliondoka kaburini hapo. 

TURUDI MAISHA YA SASA 

Hiyo ilikuwa ni kumbukumbu ambayo Desmond alikuwa akiikumbuka  alipokuwa akiitazama picha ya pamoja aliyopiga na Mama yake.  Aliichukua picha hiyo iliyo ndani ya waleti yake kisha  alisema 

“Mama natamani ungekuwepo uone Maisha ninayoishi, nimekuwa  tajiri nina kila kitu ila sina Baba wala Mama, Baba yangu  alikufa kwa pombe kali….” Alipokuwa akiyasema maneno haya  Noela alikuwa akiingia chumbani, Desmond hakushtuka kama  Noela alikuwa ameingia, Noela alimsikia Desmond akisema 

“Kipo kirusi Mama, nahangaika kukiondoa ili niwe huru zaidi”  Alisema Desmond lakini ghafla alihisi kuna Mtu anamsikiliza,  ni kweli alipogeuka alimuona Noela akiwa anamtazama, Desmond  alionekana kuwa mwenye siri nzito sana ndani yake, siri  ambayo hakutaka Mtu yeyote aijuwe huku lengo lake kuu likiwa  ni kumuuwa Mke wake.

“Kirusi? Ukiondoe?” Aliuliza Noela, Desmond alimtazama Noela  kwa Makini sana akagundua alikuwa hajaelewa lakini macho ya  Desmond yalikuwa yakivujisha chozi, Noela alimpatia kitambaa  Desmond ili afute chozi hilo, aliketi akamuuliza tena 

“Kirusi gani untaka ukiondoe?” Aliuliza Noela, Desmond  alifuta chozi kisha alimwambia Noela 

“Mimi na marehemu Mama yangu tulikuweka ahadi kuwa nitakuwa  na pesa nyingi sana na pia nitaowa, pesa ninazo lakini  sijaowa, kwangu nachukulia kama kirusi kwenye ahadi yangu”  Alisema Desmond, Basi Noela alitabasamu tu 

“Kubali nikuowe Noela ili uwe wangu peke yangu, jinsi  ninavyokupenda nahisi Dunia yote nimeiweka kiganjani pangu”  Yalikuwa ni maneno matamu sana aliyoyatoa Desmond ili  kumfanya Noela asihisi chochote kile, kweli Noela alihama  kihisia akasahau kila kitu 

“Naanzaje kukataa Joshua? Nipo tayari uniowe hata kesho.  Nikikumbuka jinsi tulivyokutana moyo wangu unajawa na furaha  na amani sana. Nakupenda pia Joshua” Alisema Noela kisha  alimkumbatia Desmond. 

Sura ya Desmond ilibadili taswira kutoka kutabasamu hadi kuwa  mtu aliye siriazi na jambo lililo akilini mwake. 

Majukumu ya kazi yaliendelea kwa pande zote yaani kwa Desmond  na kwa upande wa Noela, kumpata Desmond kulimpa furaha sana  Noela akawa anachapa kazi zake. 

Mchana wa siku hiyo, Desmond alienda Hospitalini kama  kawaida, alipewa nafasi ya kumuona Mke wake Mandy. Alikuwa na  hasira na Mwanamke huyo. Mandy alikuwa amepoteza fahamu kwa  zaidi ya miezi mitano hivyo kwa kipindi chote alikuwa  Hospitalini tu, Desmond alisogea akaketi kwenye kiti kimoja  ambacho kilikuwa kando ya kitanda cha Mke wake, alikunja nne  kisha akamwambia Mandy 

“Nina uhakika unanisikia Mandy! Katika vitu sitamani kuona  katika Maisha yangu basi ni uhai wako, natamani uwe umekufa  na usiamke tena hapo Kitandani” Alisema Desmond akiwa  amevalia suti nyeusi zilizomkaa vizuri, alikuwa kijana mwenye  muonekano mzuri sana. Desmond alisimama kisha alimsogelea  Mandy

“Siri unayoijuwa kuhusu Mama yako ibaki kuwa siri ya  Ulimwengu mzima, sipo tayari kuyaharibu Maisha yangu  kwasababu yako. Asante kwa utajiri mkubwa ulioniachia Mandy,  nasikitika sababu uliyemuamini siku zote hakuwa na mapenzi na  wewe, sikuwahi kukupenda Mandy….Nilizipenda pesa zako tu”  Alisema Desmond kisha alivuta pumzi zake huku chozi  likimlenga, licha ya uamuzi huo mgumu bado alionesha kuumia  ndani ya Moyo wake 

Ghafla aliona Mandy akitingisha kidole, hii ilimshtua sana  Desmond, miezi yote Mandy hakuwahi kutingisha hata kope za  macho yake, ilionesha wazi hata alichokizungumza Desmond  alikuwa akikisikia. Akiwa anaendelea kushangaa Desmond aliona  macho ya Mandy yakifunguka huku yakibubujikwa na mchozi,  Mandy alikuwa ni Mwanamke mzuri mwenye weupe wa asili, chozi  la Mandy lilionesha wazi kuwa lilibeba maumivu makali sana 

“Mandy umeamka? Ina maana siri yangu utaisema!! Hapana  Unakufa” Alisema Desmond ndani ya moyo wake huku akiwa  amevurugwa sana, aliangalia huku na kule kisha alichukua mto  na kumziba pumzi Mandy ili afe pale kitandani. Mandy  alihangaika kwa nguvu chache aliyokuwa nayo lakini hakuweza  kufanya lolote zaidi ya kuziona pumzi zake zikifika mwisho,  Desmond alidhamiria kumuuwa Mandy mchana huo ili hiyo siri  yake isijulikane. 

Mara Desmond alisikia chupa ikivunjika, alipogeuka alimuona  nesi Lucia akiwa anaokota vipande vya vyupa pale mlangoni.  Haraka aliacha jaribio la kutaka kumuuwa Mke wake Mandy.  Aliuweka mto pembeni, alikuwa akitokwa na jasho jingi kisha  alimtazama Mandy alionekana kuzima, Desmond aligeuza macho  alimuona nesi Lucia akisogea hapo 

“ooh Desmond” Alisema Nesi Lucia huku akiwa anaweka vifaa juu  ya meza iliyo pembe ya ukuta, alipomtazama vizuri Desmond  alimuona akiwa anatokwa na jasho jingi sana, alishangaa kisha  alipeleka macho yake kwenye AC, kisha alirudisha kwa Desmond.  Alionekana kushangaa jasho la Desmond lilitoka wapi ikiwa  chumba hicho kilikuwa hakina joto kabisa 

“Kulikoni Desmond mbona unavuja jasho hivyo” Aliuliza Nesi  Lucia akiwa anamtazama kwa makini Desmond 

“Aaah- aaah…Jasho….unajuwa!! Lucia sijisikii vizuri  naomba nipumzike nje” Alisema Desmond kisha alitoka lakini  Nesi Lucia aliendelea kujiuliza maswali yasiyo na majibu,  mwisho alipuuzia jambo hilo.

Alienda kumtazama Mandy, alionekana kupowa huku mapigo ya  moyo yakienda sawa kwa maana Desmond hakufanikiwa jaribio la  kuondoa uhai wa Mandy, alibadilisha dripu na kufanya mambo  mengine kisha naye alitoka. Hali ya Mandy haikujulikana kwa  wakati huo kuwa ataamka lini wala saa ngapi laiti kama  taarifa ya kuamka kwake ingewafikia madaktari basi tumaini  lingekuwa kubwa sana. 

Akiwa nje ya wodi ile, Desmond aliendelea kutafakari kuhusu  usalama wa Mandy, alifikiria kama Mandy alikuwa amekufa au  alikuwa hajafa na kama hajafa basi siri yake iliyojificha  kuhusu Mama yake Mandy ingefichuka, akiwa hapo alisikia sauti  ikimuita 

“Mr Desmond” Alipogeuka alimuona Mtu mmoja akiwa amemsimamia,  alishtuka sana sababu hakutarajia kumuona Mtu huyo kwa wakati  huo 

“Mbona umeshtuka au hukutarajia kuniona?” Alihoji Mtu huyo  aliyekuwa Mwanaume mwenye sauti nzito 

“Hapana ila nilikuwa mawazoni ndiyo maana nimeshtuka” Alisema  Desmond kisha aliketi vizuri ili Mwanaume huyo naye aketi 

“Hali ya Mkeo vipi?” Aliuliza Mwanaume huyo 

“Mke wangu anaendelea…Hali yake bado ipo vile vile” Alijibu  Desmond 

“Mkeo ni shahidi namba moja wa kifo cha Mama yake, mara ya  mwisho alituma ujumbe kituo cha polisi kuwa anamjuwa Muuwaji  wa Mama yake, baada ya hapo ndiyo tukio la wewe kupigwa  risasi na Mke wako kupigizwa ukutani lilipotokea, Mkeo ni Mtu  muhimu zaidi katika kesi ile” Alisema Mwanaume huyo ambaye  sasa alitambulika kuwa ni askari 

“Yaah! Ni kweli, ilikuwa ni siku ngumu sana katika Maisha  yangu ni kama nilimpoteza Mke wangu tokea siku ile hadi hivi  leo” Alijikakamua Desmond kisha alijibu, huyu Desmond  alionekana wazi kutambua juu ya kifo cha Mama yake Mandy  lakini kwanini hakutaka ukweli uwekwe wazi? Au yeye ndiye  aliyemuuwa Mama yake Mandy? Kwanini Amuuwe? TUSONGE MBELE 

“Kwa lolote usisite kutujulisha Mr. Desmond” Alisema Askari  huyo kisha aliondoka hapo. Kumbe nesi Lucia alikuwa  anamuangalia Desmond akizungumza na polisi kisha alipoondoka  yeye alimfuata Desmond alipokaa

“Desmond najuwa unavyojisikia, najuwa unaumia sana lakini  Mkeo atakuwa sawa tu siku moja mtarudi kuwa kama zamani”  Alisema Nesi Lucia, Desmond alimtazama Lucia kisha alijisemea  moyoni 

“Ungejuwa ninavyotamani afe wala usingesema hayo maneno”  Kabla hajamjibu chochote Lucia alipokea simu ya Noela 

“Hello” Alisema Desmond baada ya kupokea simu hiyo 

“Desmond nakusubiria Mgahawani” Alisema Noela kisha Desmond  alijibu 

“Sawa nakuja” 

“Unaenda wapi?” Alihoji Lucia 

“Mjini” 

“Hata mimi ninaenda huko kwa ajili ya chakula, tafadhali nipe  lifti” Alisema Lucia 

“Haya sawa!” alisema Desmond kisha waliongozana hadi kwenye  gari ya Desmond na safari ya Kuelekea Mjini ilianza. 

Wakiwa barabarani Nesi Lucia macho yake yote yalikuwa kwa  Desmond, alimpenda sana Mwanaume huyo lakini alishindwa  kumwambia sababu alikuwa Mume wa Mtu istoshe alikuwa  akimuuguza Mke wake huyo. 

Desmond aligundua hilo akamuuliza Lucia 

“Kwanini unaniangalia hivyo?” 

“Desmond wewe ni Mzuri sana, Hakika Mke wako anajivunia kuwa  na Mwanaume kama Wewe” Alisema Lucia kisha Desmond  alitabasamu kidogo alafu hakusema chochote kile hadi anafika  eneo ambalo Lucia alikuwa akienda. Ilikuwa ni kwenye mgahawa  huo huo ambao Desmond alienda kukutana na Mpenzi wake Noela 

“Eeeh ajabu kumbe nawe ulikuwa unakuja hapa?” Aliuliza 

“Yaah! Kuna Mtu naonana naye mara moja kisha niendelee na  majukumu mengine” 

“Haya asante kwa Lifti” Alisema Lucia kisha alishuka akaingia  kwenye mgahawa huo ambao ulikuwa wenye hadhi kubwa na pia  ulikuwa mkubwa mno, Desmond alienda mahali ambapo alipanga  kuonana na Noela. 

Nini Kitaendelea? USIKOSE SEHEMU YA PILI 

Mpe Nguvu ADMIN Kwa ajili ya kuendelea kutuma SIMULIZI Mpya Na Kuipost HAPA Kwa kumtumia Chochote kupitia

Lipa Namba: 57900454
Jina: LIPA KIJIWENI TIPS
Mtandao: VODACOM  

SOMA RIWAYA YA KOTI JEUSI KWA KUBONYEZA HAPA 

SOMA RIWAYA YA FUNGATE KWA KUBONYEZA HAPA 

SOMA RIWAYA YA NILIPANGA NYUMBA MOJA NA MAJINI 

SOMA RIWAYA YA GORYANAH HAPA 

SOMA KISASI CHANGU HAPA  

SOMA RIWAYA YA MSALA HAPA

JIUNGE NIPO KIJIWENI Kwa Kubonyeza Hapa

Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx Love&Pain xx